ALT-HAMICH

Zum Dorfbild aus vergangner Zeit
in Hamich goar nix bessres geit
als Roadhaus, Kirch und Häusla zamm,
drüm dürf mer doavoa nix wagnamm.

Ganz gleich, ob mers beim Toch betroacht,
davor moal stiahn bleit in der Noacht:
A Seltsamkeit en überkümmt,
mer die Vergangaheit vernümmt.

Dar Winkl brengt es fertich goar,
zu spürn, wies sunst in Hamich woar.
Es is halt a vertreemtr Fleck,
ar koann die Heimatliab fei weck.

Grod bei dan Bild kümmts doadrauf oa,
daß alles ümmer bleit schüa doa.
Tät öbbes bloß doavoa verschwind,
wär des fürs ganza Dorf a Sünd.

A bißla Stolz is oagebroacht,
wenn mer dan Winkl still betroacht.
Ganz sicher fellt en doabai ei:
Sou sölls aa für die Zukunft blei!

von Paul Warmuth
aus "Fränkische Hausmannskost"